ສ້າງຄຸນຄ່າໃຫ້ກັບສັງຄົມ

ກຸ່ມບໍລິສັດ ພອນສັກ ມີຄວາມພາກພູມໃຈເປັນຢ່າງຍິ່ງ ໃນການປະກອບສ່ວນເຂົ້າໃນການຍົກລະດັບການພັດທະນາເສດຖະກິດ-ສັງຄົມຂອງປະເທດ, ແລະ ຄວາມພະຍາຍາມຢ່າງຕໍ່ເນື່ອງ ເພື່ອຊ່ວຍຍົກລະດັບຊີວິດການເປັນຢູ່ຂອງພະນັກງານ ແລະ ຊຸມຊົນທ້ອງຖິ່ນ. ກຸ່ມບໍລິສັດ ພອນສັກ ມີປະຫວັດອັນດີເດັ່ນໃນການປະກອບສ່ວນເຂົ້າໃນການພັດທະນາກິລາ ແລະ ການສຶກສາຂອງ ສປປ ລາວ, ນັບແຕ່ການສະໜັບສະໜູນໂຄງການກິລາ ແລະ ການແຂ່ງຂັນແຫ່ງຊາດ ຈົນເຖິງການບໍລິຈາກຄອມພິວເຕີ ເພື່ອສະໜັບສະໜູນຄວາມກ້າວໜ້າຂອງໂຮງຮຽນ ແລະ ການສຶກສາຂອງ ສປປ ລາວ.

ກຸ່ມບໍລິສັດ ພອນສັກ ຍັງໄດ້ອຸທິດທຶນຮອນເຂົ້າໃນການພັດທະນາແຫຼ່ງຊັບພະຍາກອນ ເພື່ອປັບປຸງຊີວິດການເປັນຢູ່ຂອງຊຸມຊົນ ແລະ ໃນອ້ອມຮອບຂອງໂຄງການ. ເປັນຕົ້ນຢູ່ແຂວງສາລະວັນ, ກຸ່ມບໍລິສັດ ພອນສັກ ໄດ້ປະກອບສ່ວນກໍ່ສ້າງສະຖານທີ່ເຮັດກິດຈະກຳ ແລະ ຫໍພັກໃຫ້ໂຮງຮຽນສາມັນກິນນອນຊົນເຜົ່າແຂວງສາລະວັນ ໃຫ້ແກ່ນ້ອງນັກຮຽນທີ່ດຳລົງຊີວິດ ແລະ ຮຽນຢູ່ທີ່ນັ້ນ. ກ່ອນໜ້ານັ້ນນັກຮຽນແມ່ນຍັງບໍ່ມີພື້ນທີ່ຈະຈັດກິດຈະກຳຕ່າງໆ.

ນອກຈາກນັ້ນ, ກຸ່ມບໍລິສັດ ພອນສັກ ຍັງໄດ້ໃຫ້ການຊ່ວຍເຫຼືອດ້ານທຶນການສຶກສາ ແກ່ນັກຮຽນພິການໃນແຂວງວຽງຈັນ ແລະ ຈະສືບຕໍ່ໃຫ້ການສະໜັບສະໜູນໃນແຕ່ລະປີ ຈົນກວ່າຈະຮຽນຈົບຊັ້ນສູງ.